当前位置: 主页 > 港澳名报

以老帶新融為一體 烏拉圭格食格驅韓|東方日報

2022-11-24 15:01:57
今晚H組大戰,烏拉圭硬撼「太極虎」南韓。烏拉圭今屆以老帶新,唔只靠一班2010年世盃殿軍功臣,費達歷高華維迪等新世代亦告崛起;南韓仲係由孫興民孭飛,想做攔路虎唔易,主勝有計。(Now 618及616周四晚9時直播)

南韓太過倚賴孫興民

烏拉圭喺2010年世盃奪得殿軍佳績,幾位當年功臣高甸、卡雲尼及蘇亞雷斯等今屆仍在陣中。自從主帥迪亞高艾朗素領軍後,有效咁將老、中、青球員融為一體,好似賓坦古亞、費達歷高華維迪及達雲紐尼斯等新世代,已經喺歐洲大聯賽站穩陣腳,其中皇馬中場發電機費達歷高華維迪,突破同後上埋門均有一手,難怪佢哋近9仗錄得7勝1和1負,不容忽視。

南韓主帥保羅賓圖戰術保守,同時單靠孫興民數胡,佢哋近3仗熱身賽獲2勝1和入4粒,但對手只係哥斯達黎加、喀麥隆及冰島之流,其中兩球來自「孫仔」,呢位王牌早前為熱刺上陣搞到眼眶骨折,雖然可戴保護面罩訓練同比賽,但表現或會打折扣,另一前鋒黃喜燦有傷未必出得,攻力進一步受削。兩軍近5次交鋒,烏拉圭獲4勝1負,擺明格食格,有力打響頭炮。
相关视频及分析 更多>>