今晚非國盃E組賽事，衞冕嘅阿爾及利亞面對塞拉利昂。阿爾及利亞無論球員質素同經驗都遠勝對手，而且佢哋喺非國盃踢得非常搶韁，近5仗非國盃半場全部取得領先優勢，半場主勝值得再追。（Now 639周二晚9時直播）
繼續被捧為奪冠大熱嘅阿爾及利亞，於上月阿拉伯盃6戰不敗封王，士氣高昂，球員狀態亦弗到漏，今次非國盃再加入曼城中場馬列斯，仲有菲侯利等上屆奪冠捧盃功臣助陣，阿當奧拿斯及賓華馬幾位鋒將的表現同樣值得留意，有咁多攻擊好手助拳，呢支衞冕之師大有本錢踢進攻足球。
決賽周稀客實力差兩班
塞拉利昂係非國盃決賽周稀客，過去僅曾兩次出席決賽周，成績麻麻，上屆非國盃佢哋更被國際足協禁止參賽，今次係塞拉利昂歷史上第3次出席決賽周，好不幸佢哋首場比賽即面對上屆冠軍，今仗取勝難度可想而知。塞拉利昂陣中大部分主力踢緊二三線聯賽球隊，包括效力中超球會河南崇山龍門前鋒布亞圖雷，整體實力非常有限，經驗肯定欠奉。
預計實力秤先嘅阿爾及利亞今場可以輕鬆控制戰局，而且佢哋鍾意速戰速決，盡早奠定贏波基礎，佢哋對上5仗非國盃全部半場已經領先，半場主勝有計。
