周四凌晨英冠獨腳戲，「5哥」西布朗主場迎戰普雷斯頓。雖然兩軍排名差成條街，但西布朗向來守強攻弱，尤其係初段踢得小心翼翼，普雷斯頓造訪強敵亦唔敢冒進，半場和值得捧場。（周四凌晨4時開賽）
西布朗雖然位居前列，但早前陷於低潮，各項賽事近6仗只得1勝，就係上輪聯賽3比0擊敗彼德堡，總算成功止跌，喺呢6仗僅入5球，其中3仗更交白卷，陣中首席射手哥林羅賓遜今季聯賽只有5球進帳，攻力欠銳係最大問題。查實西布朗戰罷27輪聯賽，僅入34球，係前6中入波最少球隊，不過話分兩頭，佢哋只失20粒，失球之少冠絕英冠，由前拜仁後衞艾斯美執教下，戰術上明顯更重視防守。
普雷斯頓作客求穩
另一邊廂，普雷斯頓則喺中下游掙扎，好彩近5仗聯賽取得2勝2和1負，包括作客以2比1反勝史篤城，不斷搶到分無疑令信心提升，單計近3仗聯賽作客全開半場和，睇得出其客場穩陣行先策略。
其實西布朗喺初段亦分外保守，各項賽事近7仗有6仗開半場和，而這6仗半場波膽均為0比0，包括上仗大勝彼德堡，半場都係互交白卷，直至78分鐘先至打破僵局，可見佢哋初段都係先求唔輸，謀定而後動嘅特點，預計今仗初段都會陷於膠着，半場和值得再追。
