另一場非國盃16強，馬里對赤道畿內亞，以小組首名出線嘅馬里，陣中大部分球員效力法甲、英超及德甲球隊，今屆3戰取得2勝1和，無論整體人腳質素及成績都喺赤道畿內亞之上。事實上，雙方近3次對賽，馬里獲得全勝，主勝值博。（Now 638周四凌晨3時直播）
馬里曾經係法國殖民地，所以唔少球員前往法甲搵食，包括南特前鋒卡利法高列巴利、雷恩後衞咸馬利查奧爾等法甲兵。另外，仲有效力德甲勁旅RB萊比錫嘅中場阿馬度希達拉，效力英超修咸頓嘅前鋒迪贊尼普。不過要數今屆非國盃表現最出色嘅馬里球員，必定係效力挪超薩普斯堡嘅前鋒伊巴謙馬干尼，佢喺3場分組賽都取得入球，相信馬里有力撕破赤道畿內亞防線。
赤道畿內亞質素低兩班
至於赤道畿內亞喺分組賽3戰2勝1負，以次名出線，但其實兩場勝仗都係小勝1比0，面對實力較強大嘅科特迪瓦即輸波收場，可見佢哋遇上非洲一線強隊，並無力發圍。赤道畿內亞球員主要效力西班牙低級別聯賽球隊，大賽經驗唔及馬里，預料係時候行人止步。
