今晚世盃外亞洲區第3圈賽事，A組黎巴嫩主場迎戰「太極虎」南韓。作客嘅南韓目前排喺小組次席，而且領先第3位嘅阿聯酋8分咁多，爭取頭兩名直接出線席位形勢大好。不過「太極虎」都希望盡早鎖定決賽周資格，賽前拉隊集訓備戰極為認真，實力同狀態都喺黎巴嫩之上，有力反客為主，直取客勝。（周四晚8時開賽）
南韓目前喺小組以4勝2和排第2位，以2分之差落後畀榜首伊朗，今場如果順利贏波，而第3位嘅阿聯酋失分，南韓就可以提前3輪晉級決賽周，為免夜長夢多必定想盡早達到目標。雖然孫興民及黃喜燦兩大球星因傷未有入選，不過南韓夠晒認真，月中已經安排國內聯賽嘅國腳進行集訓，並喺兩場熱身賽入面大勝冰島5比1及4比0大炒摩爾多瓦，顯示一眾球員狀態極佳，今場再有金玟哉、鄭優營及黃義助等外流歐洲球星歸隊，實力值得信賴。
黎巴嫩火力弱信唔過
黎巴嫩依家排小組第4位，6場賽事只有1勝，雖然仲有機會爭附加賽席位，不過佢哋攻力相當疲弱，小組6戰只入得4球，要搶附加賽資格今仗焗住搶攻，只會影響球隊發揮。黎巴嫩過去5次同南韓交鋒從未贏過，只有1和4負成績，今仗再輸機會極大，客勝屬可靠之選。
