世盃如火如荼之際，踢完16強今明兩日有個空檔，不過球迷一樣有波玩，今晚有場英格蘭足總盃第二圈重賽，由乙組嘅史托港迎戰英甲查爾頓。兩周前雙方踢成2比2，不過查爾頓作客不濟，近11場只係贏過1場，史托港有望憑主場之利更進一步，小讓平半撐上盤。（myTV SUPER周四凌晨3時45分直播）
主場出擊搶得就搶
雙方以往交手，查爾頓贏多輸少，不過兩周前喺英足盃交鋒，查爾頓半場領先2比1下，畀史托港喺90分鐘追和，搞到今晚要重賽。目前喺英甲位處中下游嘅查爾頓狀態極曳，近5場只得2和3負，如果只計作客仲大鑊，近11場法定時間只係贏過1場，作客例牌腳軟，加上射手史托奇利因行為不檢被罰停賽3場，今場繼續缺陣，對查爾頓爭勝有一定阻礙。
乙組仔史托港雖然級數唔及對手，但佢哋主場表現醒神，近5戰錄得4勝1負，累積各項賽事近10場獲7勝2和1負，包括啱啱喺聯賽作客大炒哈特普爾5比0，近5場合共省入14粒，多位中前場球員腳風甚順，今場乘勇出擊，可望搞掂查爾頓晉級下圈。由於已經抽籤，下輪對手同樣係乙組球隊華素爾，史托港甚有機會再進一步，今場肯定會藉地利搏老命，小讓平半抵玩。
