比甲周中快車，韋斯達路主場迎戰榜首亨克，韋斯達路踢法開放，經常出現大量入球同失球，極富娛樂性，亨克靠強勁攻力坐上1哥位置，今場隨時反客為主，加上雙方近6次交手5次開3球或以上，今場等睇入球騷，中位數2.5球入球大有計。（周三凌晨3時45分開賽）
韋斯達路今季重上比甲，球隊背後有土耳其富商支持，擁有多位土耳其外援，世盃期間亦喺土耳其集訓，佢哋升班後成績唔差，企穩前10名，有能力挑戰前列位置，睇番佢哋季初表現，出現多場大比數賽果，例如4比2贏標準列治、4比5輸畀梅赫倫，首循環作客亨克更大敗1比6，聯賽20仗入39球失35球，攻力排第3，失球數字卻係前列最多，係大盤客恩物。
入球量冠絕比甲
亨克今季重返爭標行列，20戰取得17勝1和2負佳績排榜首，上輪之後拋離衞冕嘅聖基萊斯聯7分，佢哋攻力最強，20仗入49球屬聯賽最多，世盃前錄得17勝1和強勁走勢，直至聯賽重開輸畀哥治先斷纜，但其後即以3比1擊敗勁旅布魯日，上仗小勝華雷根1比0，正準備開啟另一輪連勝走勢，今場對住有前冇後嘅韋斯達路，唔憂冇波入。
