英超前列大戰，曼聯主場對阿士東維拉，「紅魔鬼」曼聯一對正選中堅華拉尼、利辛度馬天尼斯養傷之下，防線有隱憂，恐怕今仗唔敢太冒進，只要唔輸，已經對於保住前4位大有幫助。阿士東維拉狀態大勇，近10場英超取得8勝2和，聯賽首循環交鋒亦贏過曼聯，維拉今仗受讓半一，必捧下盤。■（Now 622周日晚9時直播）
曼聯陣容不整之下，近期成績明顯受影響，包括歐霸盃8強次回合吞西維爾3蛋，英足盃4強踢到互射12碼先至淘汰白禮頓，上仗英超面對狀態低迷嘅熱刺，竟然上半場領先2球之下，最終被逼和2比2，換言之「紅魔鬼」近3場賽事法定時間都贏唔到，今場仲要讓波，未免太被高估。
紅魔前4穩陣戰意成疑
曼聯除咗近況欠佳之外，爭前4位形勢上，今仗亦冇必要贏，畢竟已經領先第5位熱刺及第6位阿士東維拉6分，並踢少對方2場，所以只要今場唔輸，前4位就好穩陣，冇必要同維拉硬碰。
阿士東維拉走勢銳不可當，近10場英超取得8勝2和，包括大勝另一支前列球隊紐卡素3比0，領隊艾美利豪言要取得下屆歐洲賽入場券，搶分決心非常大。值得一提，艾美利上年11月接過維拉帥印，第1場比賽就係以3比1擊敗曼聯，相信今仗應該都有分落袋。
