英超3頭馬車曼城、阿仙奴和利物浦分別在歐聯和歐霸8強出局，3隊分別輸畀西甲、德甲和意甲球隊，就更加令不少英超球迷大為失望。最慘係本來諗住曼城主場可以食硬皇馬晉級，或會因為要分心歐聯而令阿仙奴和利物浦有機會在聯賽偷雞的希望都幻滅埋，可想而知兩隊球迷呢排有幾咁失落。老實說，利物浦能有今日嘅成績已超預期，睇幾十年波，從未見過一隊能將整條中場大換血的球隊能立即稱霸，若然咁都可以贏英超，其他球隊可以搵舊豆腐一頭撼埋去自殺，因此，利迷實在不用覺得太揼心。反而我真心替廠迷不值，對維拉前，明明聯賽主導權在自己手中，但下半場紀錄仍然是0:0時，領隊阿迪達居然換走隊長兼靈魂馬田奧迪加特而換入季內全無表現的伊美路維，這個換人帶出的訊號即使不是「放棄」都起碼是「無決心」，居然仲有人為此解話聲稱「奧隊」傷，結果佢歐聯8強次回合對拜仁一仗正選兼打足全場，一切解釋不攻自破。
狼隊主場踩多一腳
阿仙奴錄得連敗，彷彿一個星期內輸盡所有，對一隊年輕球隊來說，絕對不容易；狼隊擅長反擊，今場可以乘機踩多一腳，買佢主場贏埋，最多?住「派彩快」睇下幾時收錢。馬高