英冠爭升班附加賽4強次回合，錫菲聯主場迎戰布里斯托城，錫菲聯首回合大勝3比0，晉級機會高唱入雲，相信今仗會歎慢板，保持領先優勢已經足夠，留力踢決賽好過。布里斯托城近5場作客不勝，恐怕無力收復失地，睇番雙方近8次對賽有6次總入球開2球或以下，首選中位數2.5球嘅入球細。（無綫myTV Super周二凌晨3時直播）文:Mic少
兩隊首回合戰局原本處於膠着，直至臨完上半場出現轉捩點，布里斯托城中堅羅拔迪基爾喺禁區內侵犯對手，被判罰12碼之餘，更加領紅牌遭趕出場。錫菲聯靠射入12碼打破僵局，兼踢多1人，形勢開始佔優，下半場再入多2球，贏到3比0帶有幸運成分，加上今仗唔需要贏波，都可以晉級決賽，冇必要冒險進攻，預料會以穩守突擊踢法應戰。
布城作客腳軟谷唔起
至於布里斯托城踏入季尾狀態走下坡，近4場僅有1和3負，尤其是作客往往腳軟，近15場作客竟然只有1勝7和7負，就算今仗想贏波，恐怕都有心無力，隨時已經打定輸數，球員戰意成疑。值得一提，布里斯托城今季英冠常規賽作客錫菲聯，踢到補時先至入波逼和1比1，不妨再博入球細。
