漫長嘅英超今晚上演「大結局」，冠軍同降班早已塵埃落定，煞科日焦點自然落喺「前5爭霸戰」。現時由第3位到第7位得3分差距，曼城、紐卡素、車路士、阿士東維拉同諾定咸森林當中，只得3隊可以搶到價值超過1億鎊（約10.6億港元）嘅歐聯入場券！為名為利，今晚肯定打甩髀！文:邪神
曼聯爛到入骨維拉踩多腳
今季徹底失敗嘅曼聯，今晚喺奧脫福主場對阿士東維拉。「紅魔鬼」歐霸盃飲恨，成隊灰到爆，加上賽後要急急上機展開亞洲之旅，唔慌有心機踢；維拉為爭歐聯資格不勝無歸，加上佢哋近9場聯賽錄8勝1負佳績，客勝必捧。（Now 625周日晚11時直播）
「紅魔鬼」失冠連環爆煲
曼聯近況有幾差唔使再多講，連唯一翻身機會嘅歐霸盃都輸埋，賽後連環爆煲，阿歷真度加拿祖不滿做後備，主帥魯賓艾摩廉願意唔收賠償解約，隊長般奴費南迪斯亦萌生去意，仲有班主拉特克利夫繼續裁員……由內到外都爛到入骨，就算主場謝幕，球員已經輸到麻木，仲開始為自己諗出路，點會同你搏？
對維拉嚟講，今場係爭奪歐聯入場券關鍵一戰，雖然贏波仲要睇其他賽果，但如果攞唔到分就乜都唔使講，戰意唔使懷疑。奧尼屈堅斯同摩根羅渣士近況弗到震，對住曼聯班「豆腐中堅」同門將奧拿拿，大把搵食機會，只要維拉入到波，曼聯基本上難以翻身，論近況同戰意維拉贏晒，1.61倍客勝熱得有理。
