今晚英乙升班附加賽決賽喺溫布萊上演，由AFC溫布頓大戰華素爾。兩隊風格截然不同，AFC溫布頓擁有鋼鐵防線，華素爾就大踢進攻足球。不過華素爾季尾火力銳減，而且淘汰賽未必敢輕舉妄動，捧2.5球入球細。（無綫myTV Super周一晚10時直播）
AFC溫布頓喺聯賽排第5，今季46場聯賽只係失35球，失球數字屬英乙最少，比第2少嘅巴拉福特仲要少10球，防線韌力相當驚人。佢哋喺附加賽4強，兩回合都贏諾士郡1比0，近8場賽事總入球全開2球或以下，當中6場開0球或1球，有望照辦煮碗。
華素爾改踢法穩陣行先
同對手相反，聯賽4哥華素爾今季狂轟75球，比冠軍唐卡士打仲要多，不過球隊火力跌Watt下，季尾改變踢法，近5仗僅入5球而只失2球，加上前鋒艾利斯夏里遜受傷倦勤影響進攻。嚟到升班生死戰，兩隊穩陣行先，細盤高唱入雲。
