今日下午日職下游對決，新潟天鵝主場硬撼橫濱水手。天鵝雖然排名較高，但近期跌晒Watt，主場都冇把握，反觀水手明顯有起色，今仗可反客為主，讓球客勝（+1）捧得過。（無綫82台周日下午1時直播）文:法達斯維
現時天鵝排緊尾2，領先包尾嘅水手2分，正宗「海軍鬥水兵」。天鵝狀態曳爆，各項賽事近11場，法定時間贏得兩場咁大把，就算上周中日皇盃對住低組別球隊FC福山市，法定時間只能互交白卷，到加時先入波晉級。此外，新潟天鵝今季9場聯賽主場，亦只得1勝5和3負，認真靠唔住。
搶分護級受讓筍
橫濱水手堂堂勁旅竟然淪落到包尾，梗係問題多多，特別係季初要兼顧亞冠淘汰賽，一度錄得8連敗，賽程頻密搞到攰爆。好彩佢哋都明白依家護級形勢水深火熱，係時候要的起心肝搶分，唔單止近2場聯賽連贏町田澤維亞同勁旅鹿島鹿角，上周中日皇盃索性收起主力，仲畀低組別球隊青森清海踢出局，係有少少肉酸，但睇到佢哋不惜棄盃都要護級嘅決心，今仗有得受讓咁筍，讓球客勝（+1）咪錯過。
