世冠盃B組賽事，西雅圖海灣者主場迎戰保地花高，巴甲勁旅保地花高貴為上屆南美自由盃盟主，實力有保證，加上之後2場要惡鬥巴黎聖日耳門及馬體會，更加要趁機喺同組最弱嘅海灣者身上搶3分，增加出線本錢，今場肯定搏盡，以保地花高近8場取得6勝1和1負嘅走勢，客勝可追捧。（周一早上10時開賽）文:Mic少
三線猛將經驗豐富
保地花高上季成為巴甲及自由盃「雙冠王」，戰鬥力不亞於歐洲強隊，事實上，陣中亦擁有多位球員曾經去歐洲搵食，包括前曼聯左後衞阿歷士迪尼斯、前拿玻里中場阿倫盧利奧，早前簽入國際米蘭前鋒祖亞昆哥利亞，前中後三線都有大賽經驗豐富嘅猛將撐場。最重要係保地花高整體狀態出色，各項賽事3連勝，包括自由盃擊敗智利大學，以及巴甲分別贏山度士及施亞拉，球隊愈踢愈順，有望延續強勢。
反觀西雅圖海灣者遭遇2連敗，合共失6球，猶如不設防，隊內亦欠缺知名球星孭飛，恐怕無力發圍。尤其是美職水平遠不及巴甲，即使海灣者有地利優勢，亦難以同保地花高抗衡，預料只能踢守勢波，屆時保地花高應可佔據場上主導權，有力旗開得勝。
