世冠盃16強，多蒙特對蒙特雷，「蜜蜂兵團」近期愈戰愈勇，將德甲同歐聯6連勝氣勢帶到嚟世冠盃，喺F組以2勝1和首名出線，近9場錄得8勝1和，反觀墨超勁旅蒙特雷喺E組僅得1勝2和，以次名晉級，論聲勢比多蒙特差一截，多蒙特預計可喺法定時間內解決對手，主勝睇高一線。（周三早上9時開賽）文:邪神
多蒙特剛過去球季表現令人失望，但自從季中換帥，改由尼高高華領軍後，球隊重回正軌，特別係季尾取得6連勝，將帥之間合作無間；嚟到世冠盃，球隊喺開賽前夕由新特蘭簽入嘅祖比比寧咸，呢位英格蘭天才中場祖迪比寧咸胞弟今屆3場分組賽都有上陣，其中2場正選披甲，並交出1入球1助攻，協助球隊順利贏波，可見已經完全融入，預期佢喺多蒙特繼續有進步表現，世冠盃正係佢發揮實力嘅大舞台，幫球隊一舉殺入8強。
蒙特雷飄忽靠唔住
蒙特雷喺本土賽表現飄忽，爭標接連失利，而且近況亦不穩，出戰世冠盃之前嘅4場墨超僅得2勝2負，墨超尚且難言必勝，嚟到世冠盃更加小心翼翼，分組賽首戰對國際米蘭，要靠39歲老將沙治奧拉莫斯入波嚟逼和對手，之後0比0悶和河床，分組賽最後1場靠大炒已出局嘅浦和紅鑽4比0先出線，能夠晉級16強已經有晒交代，今場面對嚟自歐洲嘅多蒙特，相信唔會咁好彩，輸波實屬意料中事。
