女子歐國盃D組大戰，兩支實力分子碰頭，法國女足對英格蘭女足，法國女足屬爭標半熱門，最重要係近況極佳，近8場錄得全勝，英格蘭女足雖然係衞冕球隊，但近況飄忽，近4場輸2次，穩定性不如「女高盧雞」，法國女足贏面高仲有得受讓平半，揀下盤有着數。（HOY TV 76台周日凌晨3時直播）文:邪神
女三獅近況稍飄忽
法國女足喺今屆女子歐國盃開賽前展現強勢，近況極之出色，近8場勝仗當中，包括最近兩場熱身賽大炒比利時女足5比0，以及3比2擊敗巴西女足。睇番佢哋人腳，以國內兩大班霸巴黎聖日耳門女足同里昂女足骨幹組成，前鋒線坐擁里昂女足雙箭頭戴安妮同埋嘉杜圖，仲有曼聯女足射手美雲瑪拉特，進攻火力十足，後防亦有迪艾美達、絲瑪芭查等當打球員，可謂攻守兼備，今場有望打響頭炮。
「女三獅」方面，佢哋係上屆冠軍，隊中擁有多名女子歐聯冠軍阿仙奴女足成員，計有隊長中堅莉亞威廉臣，攻擊球員貝芙美特、基莉同埋阿歷西亞羅素，實力同默契均屬頂級，不過球隊近況就略為飄忽，近4場錄得2勝2負，包括早前女子歐國聯2比3不敵比利時女足同埋1比2輸畀西班牙女足，至於近兩場勝仗，只係大勝葡萄牙女足同牙買加女足兩支弱旅，贏波只係佢哋本分，作為一流強隊，咁嘅表現並唔合格，今場對住法國女足唔輸都要還神，讓波肯定捧對家。
