A組兩支敗軍之將，瑞士女足同冰島女足就要為出線努力搶3分。其實呢場形勢好簡單，冰島女足近12場只係贏得1場，相反瑞士女足上場入波先被反勝，其實表現唔錯，加上有主場之利，主勝係合理投注選擇。（周一凌晨3時開賽）文:渡邊年
東道主瑞士女足，首戰鬥挪威女足其實有個好開始，中場娜甸莉臣入波早早領先，緊密防守更令「維京女」上半場冇出現過射門，可惜挪威女足始終實力強橫，瑞士反輸2球以1比2敗陣，但表現獲得主場球迷讚賞，相信今場仍然會有大批球迷入場支持，有「第12人」加持下，有望打開勝利之門。
冰女近12場僅1勝
形勢上，如果瑞士女足今仗全取3分，最後一場鬥此組排名最低嘅芬蘭女足，只要贏波就可以出線，鬥志不容懷疑。當然，冰島女足都想全取3分，因為輸波代表成為決賽周第一隊出局球隊，不過「冰女」近期似乎行緊衰運，上場鬥芬蘭都輸0比1，今場鬥實力更強嘅瑞士女足，好難全身而退。事實上冰島女足戰績極曳，近12場只得1勝，低迷嘅狀態真係信唔過，瑞士女足有望全取3分，保持出線希望。
