今晚有場焦點熱身賽，由阿積士火併些路迪。阿積士上季臨尾香失落荷甲冠軍，喺新帥希汀加帶領下誓要一洗頹風；蘇超班霸些路迪日前大炒紐卡素，盡顯強大火力，預計今場會合演入球騷娛賓。
（周五凌晨2時30分開賽）文:法達斯維
阿積士上季大好形勢下，竟然喺尾5至尾2嘅4輪聯賽未獲勝仗，眼白白將荷甲冠軍拱手讓予燕豪芬，真係自己攞嚟衰，結果教練費利奧利離隊謝罪，球隊搵嚟名宿希汀加接手。呢位41歲前荷蘭國腳，不但球員時期兩度效力阿積士，掛靴後亦教過青年隊，喺2023年1月更臨危受命執教阿積士一隊半季，最終止跌獲得第3名。其後希汀加喺韋斯咸同利物浦做助教，上季輔助同胞施洛率領「紅軍」勇奪英超冠軍，終獲垂青回歸母會再度合作。
雖然阿積士今夏冇乜入貨，並有佐敦軒達臣等離隊，但呢支荷甲名門一向注重提拔自家青訓產品，影響唔算好大，近4場「拍跳」取得3勝1和共轟12粒，可見希汀加都係崇尚進攻，貫徹阿積士傳統風格。
「東瀛幫」支撐蘇超班霸
另邊廂，些路迪近14季13度稱霸蘇超，喺國內打橫行，教頭羅渣士進攻大過天，單計聯賽上季38場就入過百球。些路迪今夏繼續組建「東瀛幫」，稻村隼翔同山田新先後加盟，仲有前田大然及旗手怜央做「盲公竹」，相信好快融入，加上「拚命三郎」基蘭泰亞尼從阿仙奴回巢，實力有增無減。些路迪之前5場熱身賽贏咗4場，日前對住英超紐卡素更豪贈4蛋，信心爆棚，相信今場都係鬥攻格局，實多波入。
