今晚法甲尾場，里昂主場火併巴黎聖日耳門（PSG）。里昂近況欠佳，仲有多名主力要出戰非國盃而缺陣，PSG就算有球王美斯及尼馬倦勤都冇有怕，基利安麥巴比剛突破職業生涯200球里程碑弗到爆，可以恃質取勝，客勝好路。（Now??639周一凌晨3時45分直播）
腳風超順勒唔住
里昂早已不復當年勇，近4仗聯賽只得3和1負，依家只徘徊中游位置，而且陣中3位前鋒托高伊甘比、施利文尼及卡迪韋尼，因為要遠赴喀麥隆出戰非國盃而缺陣，進攻中場盧卡斯柏基達早前確診新冠肺炎，雖然好番但未必出得，火力進一步受削。今季加盟嘅「瑞士美斯」梳頓沙基利，至今只入1粒已淪為後備，表現差強人意。
PSG早前宣布美斯、祖安巴尼特、基安盧基當拿隆馬等確診，另一王牌尼馬仲養緊傷，好彩有基利安麥巴比擔大旗，呢位法國國腳唔單止今季聯賽有9球進帳，上周中法足盃大勝瓦納4比0之役，更大演帽子戲法，令佢喺職業生涯累積201球，弗到漏油。早前受傷嘅箭頭莫路伊卡迪，亦喺上輪聯賽對羅連安特取得救命扳平士哥，逐漸上力。加上雙方近5次聯賽碰頭，PSG取得4勝1負，今仗有力反客為主，客勝有計。
