今晚德甲繼續開快車，頭場有緬恩斯主場迎戰多蒙特。多蒙特雖有中場核心祖迪比寧咸坐波監，但另一新星尤素法莫高高啱啱續約，而戰勝癌魔嘅施巴斯坦賀拿終於復出，令士氣大振，加上近年交手食住緬恩斯，讓平半照捧上盤。
（周四凌晨1時30分開賽）
多蒙特復賽即開個靚頭，上仗驚濤駭浪之下險勝奧格斯堡4比3，儘管有波入嘅祖迪比寧咸累積黃牌夠數，今仗要停賽，幸好今季加盟冇耐即確診睾丸癌嘅施巴斯坦賀拿終於康復，上仗亦有後備登場，而另一名後備上陣嘅球員基奧雲尼雷拿攻入奠勝士哥，贏得咁熱血確能振奮軍心。除此之外，多蒙特同尤素法莫高高嘅續約拉鋸戰終告一段落，宣布續約到2026年，呢位德國新星可專心為「蜜蜂兵團」效力。
緬恩斯防線不穩
另邊廂，緬恩斯上仗打和護級分子史特加1比1，狀態麻麻，而且正選門將辛特拿仲未好番，續由後備門將芬倫達文把關，對防線嘅信心難免打折扣。翻查紀錄，雙方近3次正面交鋒，「蜜蜂兵團」全部贏晒，明顯格食格，今仗有力反客為主，上盤捧得過。
