兩大射手養精蓄銳 巴塞主場明恰皇蘇|東方日報

西班牙盃8強，兩支近況大勇嘅球隊交手，巴塞隆拿主場迎戰皇家蘇斯達。巴塞今場有兩大攻擊手，羅拔利雲度夫斯基同費倫托利斯上場聯賽停賽後復出，養精蓄銳應付今場，皇家蘇斯達態勇，但近年畀巴塞食住，睇嚟都好難打破魔咒，熱捧主勝。

（周四凌晨4時開賽）

羅拔佬曾兩破皇蘇大門

今季係沙維喺巴塞完整接手嘅一季，呢支西甲傳統勁旅勢頭甚好，近幾場聯賽贏晒，反壓皇馬排榜首，早前喺西超盃決賽更擊敗呢支死敵奪冠。嚟到西班牙盃16強鬥丙組仔施奧達，都派遣大量正選上陣，大炒對手5蛋殺入8強，可見沙維喺歐聯分組賽未能進身淘汰賽後，決意喺國內立威，希望盡擸西甲同西盃。

啱啱聯賽巴塞僅以1比0小勝基達菲，羅拔利雲度夫斯基同費倫托利斯因停賽無上陣，反而今場西盃可以復出，巴塞陣容更加完整，羅拔仔喺聯賽首循環曾經兩度射破皇蘇大門，助球隊作客贏4比1，有佢在陣唔愁無波入。

皇家蘇斯達今季發揮確係醒神，不過始終多年都畀巴塞剋住，近7次交手只得1和6負慘烈對賽成績，格食格味濃，今場巴塞有望憑地利贏波晉級。不過，皇家蘇斯達世盃後7場全勝，巴塞未必能夠予取予攜，隨時小勝收場，鍾意博賠率嘅朋友，不妨小注讓球和。