南球盃附加賽次回合，明尼路主場迎戰布卡拉曼格體育會；巴西球隊明尼路首回合靠12碼小勝1比0，實力並冇明顯優勢，預料今仗會採取穩健戰術，但求保住勝果晉級已達標。加上明尼路近7場比賽有5次總入球開出2球或以下，最好揀中位數2.5球嘅入球細。
（周五早上8時30分開賽）文:Mic少
明尼路今屆整體表現只屬一般，分組賽僅以次名出線，導致需要踢附加賽爭入16強。睇番明尼路首回合作客哥倫比亞球隊布卡拉曼格體育會，雙方拉成均勢，直至68分鐘明尼路獲得12碼，由即將39歲嘅老牌射手侯克主射入網，先至打破僵局，贏得非常勉強，更何況今仗唔輸就可以晉級，更加冇必要冒險搶攻，以免被對手反咬一口。
布卡拉曼格勝在硬淨
另邊廂，布卡拉曼格體育會今屆自由盃分組賽排小組第3位，因而「降格」轉戰南球盃，實力平庸。佢哋唯一優點係夠硬淨，曾於自由盃分組賽兩次同巴甲球隊福塔雷薩交鋒，分別打和1比1及0比0，加上上次鬥明尼路以0比1落敗，換言之近3次對「森巴兵團」總入球全開2球或以下，入球細值得追捧。
