沙王盃16強重頭戲，艾納斯火併衞冕嘅伊蒂哈德。艾納斯近況極之出色，近10場全勝，當中9場贏對手2球或以上，反觀伊蒂哈德近期因成績下滑換帥，表現波動，艾納斯實行「趁你病攞你命」，讓球主勝（-1）睇高一線。（on.cc東網周三凌晨2時直播）文:邪神
艾納斯今季重整旗鼓，喺原有星級陣容上繼續增兵，簽入京士利高文及祖奧菲歷斯等好手，葡萄牙巨星C朗拿度獲強援協助，令連續兩季失落錦標嘅饑渴感盡情釋放。C朗上場聯賽又貢獻入波，今季累積7球2助攻，球隊聯賽累積6連勝高踞榜首，亞冠盃二錄得3連勝，上圈沙王盃亦大勝吉達體育會晉級，3條戰線齊向冠軍衝刺。
近兩次交鋒贏晒
就以最近兩次對伊蒂哈德戰況而論，喺香港舉行嘅沙超盃4強賽事，艾納斯10人應戰下仍能擊敗對手，上次聯賽交手亦喺早段連入兩球輕鬆贏2比0，沙迪奧文尼上述兩場都攻破伊蒂哈德大門，C朗拿度喺聯賽一役亦有進帳，今次再出擊贏面甚高。
伊蒂哈德係上季聯賽及沙王盃雙料冠軍，但今季表現下滑，早前辭退法國主帥白蘭斯，由葡萄牙籍教頭干斯卡奧空降領軍，淨係內部人事問題已經令人頭痛，例如隊中「法國幫」賓施馬、尼高路簡迪及穆沙戴亞比，喺白蘭斯離隊後，佢哋作戰心態如何真係冇得估，面對矢志捧盃嘅艾納斯，實在唔睇好。
