開季勢如破竹嘅利物浦，今晚英超作客新升班嘅般尼，4連勝在望！利物浦火力驚人，阿歷山大伊沙克加盟更係如虎添翼，呢位身價1.3億鎊嘅瑞典前鋒今場好大機會首演，「紅軍」肯定狂轟猛炸，半場客勝有望開出。（Now 621及611周日晚9時直播）文:工廠仔
利物浦領隊施洛今季改變踢法，戰術更加具侵略性，頭3輪賽事已攻入8球，而且每場都係先開紀錄嘅一隊，力圖用強攻擊潰對手。域斯、穆罕默德沙拿同艾基迪基組成嘅攻擊線，火力已經夠恐怖，今場仲有伊沙克候命上陣，一眾球星要爭位絕對唔會留力，肯定一開波即搶攻。
般尼對勁旅例先失
般尼實力有限，重返英超3戰兩度落敗，對住勁旅熱刺同曼聯都被攻入3球，同樣係上半場已經頂唔住失守落後。「紅軍」下周中要踢歐聯，為免消耗太多體力，會全力爭取盡早穩住勝局，翻查利物浦近5次對般尼，有4次喺上半場領先，今仗一於再追半場客勝。
