賓菲加會長選舉競爭激烈，現任會長雷哥斯達喺9月份請嚟摩連奴執教，成功「拉票」留住支持者，上周選舉獲得最多嘅42.13%票數，力壓大敵諾羅亞盧比斯嘅30.26%，不過由於得票唔夠5成，兩人會喺周六進行第2輪投票，賓菲加喺周四歐聯主場對利華古遜（周四凌晨4時開賽），摩連奴可唔可以用勝仗為雷哥斯達拉票值得關注。而雷哥斯達嘅最大對手諾羅亞盧比斯亦出招，表明已同曼城球星貝拿度施華斟介多時，當選嘅話有信心將佢帶到賓菲加。
彭馬入圍FIFPro最佳11人
國際職業足球員協會（FIFPro）尋日公布2025年「最佳11人」，歐聯冠軍巴黎聖日耳門（PSG）理所當然成為大贏家，有多達5名球員上榜，另外亦有2.5個球員嚟自英超，包括高爾彭馬（圖）（車路士）、華基爾雲迪積克（利物浦）同基安盧基當拿隆馬（曼城/PSG），彭馬領獎後表示：「能夠入選年度11人係一大榮耀，尤其係職業球員投票選出，感覺得別好。」車路士周四凌晨歐聯作客卡拉巴克，彭馬因傷仍未能候命（Now 643周四凌晨1時45分直播）。另外18歲嘅拉明耶馬首度入圍，打破基利安麥巴比紀錄，成為最年輕當選球員。
尼威一旦動刀需抖3個月
根據西班牙傳媒報道，畢爾包翼鋒尼高拉斯威廉斯（圖）今季一直受恥骨傷患困擾，8次披甲只入1球及2次助攻，狀態大不如前，會方曾為「尼威」提供「保守治療」方案，但效果欠佳，現時唔排除需要開刀，如果落實，估計「尼威」將休息3個月，勢必影響球隊成績。畢爾包將於周四凌晨歐聯作客紐卡素，「尼威」能否上陣，亦成為疑問。（Now 638周四凌晨4時直播）
