今晚英超重頭戲上演「倫敦打吡」，車路士主場激戰阿仙奴，榜首「兵工廠」表現大勇，上場歐聯擊敗宿敵拜仁慕尼黑，各項賽事近13場取得12勝1和，加上今季英超4次鬥同市球隊，獲得全勝，名副其實係「倫敦之王」。至於「車仔」即使近期亦頻頻奏捷，但以往交鋒受制於對手，阿仙奴客勝比較值博。（Now 621及611周一凌晨零時30分直播）文:Mic少
雖然車路士近期取得聯賽3連勝，但當中兩場對手只係護級分子狼隊同般尼，上場歐聯能夠大勝巴塞隆拿，好大原因係多得對手連番「送禮」，先有祖利斯古迪擺烏龍，跟住朗奴阿拿奧祖食紅牌被逐，「車仔」有半場時間踢多1人，贏到3比0其實存在「水分」，不宜高估。事實上，呢支富豪球隊遇上稍具實力對手，往往未能佔到甜頭，包括上月主場不敵「奇兵」新特蘭。更何況車路士一向被阿仙奴剋住，雙方近7次聯賽碰頭，「車仔」未嘗1勝，僅有2和5負，恐怕今仗亦難以打破宿命。
「達Sir」戰術Run順靠得住
另邊廂，「兵工廠」開季以來保持高水平發揮，12場聯賽取得9勝2和1負，領先車路士6分，可見雙方即使排名接近，但實際級數有明顯距離。相比「車仔」經常換帥，阿仙奴最大優勢係由領隊「達Sir」阿迪達執教近6年，已建立一套行之有效戰術，表現更加穩定可靠，就算隊長馬田奧迪加特等主力輪流受傷，亦冇影響整體演出。尤其係進攻中場伊比爾治伊斯狀態大勇，上輪英超射入同市宿敵熱刺3球，大勝4比1，單計近7場聯賽取得6勝1和，車路士防線欠穩，呢位英格蘭國腳有力再數胡。
此外，阿仙奴上場歐聯贏拜仁慕尼黑3比1，近6次歐聯交鋒，首次擊敗呢支德甲勁旅，可見「兵工廠」狀態及信心處於巔峰，有力反客為主贏埋「車仔」，鞏固榜首優勢。
