新一季日職今日展開，由於日職將於2026/27年接軌歐洲聯賽時間表，今年世界盃之後正式開始，所以日本足協喺今年2月至6月，就特別推出一個名為「日職百年構想聯賽」嘅過渡性賽事，填補未來半年真空期，更特別嘅係，賽季會用印有《足球小將》圖案及用英文寫住漫畫名句「足球係我朋友」嘅皮球。
和波即射12碼勝方袋2分
今次單一性日職，會將20支J1球隊分成東、西區，每隊踢18場後再進行季後賽，兩區相同排名嘅球隊對壘爭最後排名，即東區冠軍對西區冠軍爭總冠軍，東區第2對西區第2，勝方成為季軍，如此類推。至於日乙及日丙共40隊就撈亂踢同一個聯賽，賽制一樣，同樣分為東西角逐。
賽制最特別嘅係，贏波攞3分，輸波0分之外，如果兩軍法定時間打和，會即射12碼，射贏獲2分，落敗得1分。日本足協為咗鼓勵爭勝，球隊每獲1分聯賽積分，就有200萬日圓（約10萬港元）獎金，藉此鼓勵各隊大踢進攻足球。
開鑼焦點撐三箭上盤
至於日職開鑼日焦點賽事，長崎成功丸主場迎戰廣島三箭。長崎成功丸上季以日乙亞軍身份升班，闊別日職7年後再度亮相，球隊擁有前日本國腳山口螢，並簽入多名新球員，但實力仍與廣島三箭有距離。廣島三箭貴為上季「4哥」並成為日聯盃及日超盃盟主，今場對升班球隊，3分志在必得，加上三箭近3場正式賽事全勝，今場小讓平半咁筍，可以放心捧上盤。
（無綫myTV SUPER周五晚6時直播）
