阿仙奴表面上領先曼城9分，但比對手踢多1場，而且之後仲要作客「藍月亮」，因此形勢唔係想像中咁樂觀。「兵工廠」飽受沉重壓力，近期聯賽都踢到綁手綁腳，因為「怕輸」更加踢唔出霸氣，英超3連勝贏車路士、白禮頓同愛華頓，過程都係飽食驚風散，近期英聯盃同英足盃接連出局，亦證明球隊喺爭冠關鍵時刻表現容易失準。文:工廠仔
特別係阿仙奴仲要喺英超同歐聯雙線作戰，日前歐聯作客惡鬥士砵亭，鬥到最後先險勝1比0，下周又要預備歐聯次回合大戰，球員體能同兵源留放都受到好大掣肘，今仗未必敢出盡全力，密集賽程下表現難予球迷信心。
縮後嚟踢考起兵工廠
相反，般尼茅夫雖然排喺聯賽中下游，但今季31場聯賽有15場和波，7次輸波屬全英超第4少，要贏佢哋一啲都唔容易。般茅喺伊拉奧拿調教下，將穩守突擊踢法演練得好純熟，作客賽事縮後嚟踢特別奏效，近7場作客拎到2勝5和不敗佳績，今場有力全身而退，受讓咁抵玩，一於捧下盤。
