今晚英超「曼市打吡」，外間視為係「藍月亮」扭轉頹勢嘅重要一役。曼城開季3場只得1勝2負，前面入埋唔夠後面輸，今仗除咗力爭3分外，仲係重建信心嘅關鍵時刻。文:謝德謙
兩軍同遇傷兵困擾
曼城主帥哥迪奧拿賽前確認，馬莫殊、卓基與艾洛利3名新兵會缺席今場，守將史東斯亦上陣成疑令手頭上可用球員唔多；不過曼聯亦唔好得幾多，馬菲奧斯根夏、美臣蒙特同達洛治都未能落場，另外門將比恩迪亞預料會繼續擔正，主帥艾摩廉就解釋唔安排新門將辛尼拉文斯冒險踢「地標戰」，因為仲要時間適應。
曼城情況剛剛相反，哥帥極有可能派新門將基安盧基當拿隆馬登場，但成效係點踢過先知，如果佢哋輸波，除積分被拋離外更嚴重打擊士氣，但若然能夠砌低曼聯，就可以重建信心。至於對曼聯嚟講，作客情況下先要守住防線，再把握反擊同埋罰球機會，希望能夠搶到分，甚至爆冷贏波。
