歐國聯A2組大戰，由高普推動重建嘅德國隊，將會作客塞爾維亞，要爭奪出線資格，今場呢3分志在必得。「日耳曼戰車」實力肯定高於主隊，不過高普嘅改革仍然係起步階段，「重金屬」踢法仲未打得響，入波板斧唔多，今場開3.5球嘅入球細機會高。
（周六凌晨3時45分開賽）文:工廠仔
高普以往執教利物浦，都係用緊逼踢法同主攻戰術，不過佢喺7月份久休復出再執教鞭，要重建走緊下坡嘅德國，絕對唔係一朝一夕嘅事。上個國際賽高普徵召44人試陣，只係初步了解各球員特性，結果只換嚟1勝2和1負成績，穩陣有餘、侵略性不似預期。
今次高普精選23人大軍，但亦係限米煮限飯，基拿比、穆斯亞拿因傷落選，卡廉艾迪耶美、丹尼斯烏達夫狀態低迷未獲垂青，就算在陣嘅進攻主力域斯、夏維斯等，近期演出都麻麻地，德國中前場可信賴球員唔多。重召老將富克洛，只係補充高空轟炸力量，進攻套路仍然單調。
塞爾維亞硬淨兼爛打
塞爾維亞今屆歐國聯4戰全敗，好大機會要降班，不過佢哋亦唔係不堪一擊，球員踢法硬淨兼爛打，4場輸波有3場都係僅輸1球。睇番兩隊之前4次對賽，總入球都係3球或以下，加上德國最近7場比賽都係開3球或以下，預計德國頂多小勝，博入球細更好路。
