英超焦點戰，水晶宮主場迎戰利物浦。水晶宮今非昔比，主帥沙治已瀕臨被炒邊緣，但佢似乎已經冇乜計，「紅軍」經歷兩連敗後，必搵水晶宮出氣博反彈，客勝熱得有理。（Now 621周日晚10時直播）文:法達斯維
水晶宮今季改由沙治接手後，成績走晒樣，開咧後9輪聯賽輸咗6場，單計近3輪輸晒共吞9蛋，已經淪為護級分子。上輪造訪熱刺以0比2落敗之餘，更有前鋒桑馬迪達領紅牌被逐，今仗要坐波監，賠了夫人又折兵，連同快翼伊斯美拿沙亞仲養緊傷，攻力進一步受削，觀乎沙治近期嘅布陣或臨場調動，就算日前歐霸末段逼和賀芬咸，但佢點變都冇乜起色。
伊沙克撻着鋒力勁
另邊廂，利物浦繼上輪聯賽輸畀阿仙奴後，日前歐聯又反輸畀費倫巴治，主帥伊拉奧拿鬧爆防守太多甩漏，雖然如此，但「紅軍」今季進攻唔曳，射手阿歷山大伊沙克8場聯賽入6粒，配合巴特利巴高拿、加普同域斯，唔愁冇供應，而且佢哋客場表現不俗，各項賽事近5仗作客贏4場，今仗難得遇弱隊，一定火力全開止跌勢，客勝有計。
