澳職開咧即有好戲上演，上季喺總決賽飲恨嘅FC悉尼，新季第1擊即迎戰同城死敵西悉尼流浪者。FC悉尼今季強力擴軍，兵源充足冠絕澳職，被視為冠軍大熱；上季經歷災難球季嘅西悉尼流浪者啱啱起步重建，難同FC悉尼匹敵，今場捧主勝。
（無綫82台周五下午5時直播）文:工廠仔
ＦＣ悉尼上季中解僱烏福達雷，改由基斯諾保接手，隨即成績冒升，最後更殺入總決賽；雖然飲恨而回，但會方亦好滿意佢嘅領軍表現，季前全力支持基斯諾保增兵，佢即時引入兩名英格蘭年輕守將占士奧華利同積及費路，加上原有嘅賴恩格蘭、阿歷大普波域等等，豪華防線極有保證。
事實上，ＦＣ悉尼攻守力量兼備，由浦和紅鑽加盟嘅關根貴大迅速融入，季前嘅澳洲盃已經入咗2球，熱身賽對熱刺亦有進帳，必成ＦＣ悉尼進攻利器。翻查往績，近年嘅「悉尼打吡」結果一面倒，雙方近8次對賽，ＦＣ悉尼有6勝1和1負成績，明顯格食格。
流浪者沉淪步入重建
西悉尼流浪者上季表現沉淪，慘錄災難性成績排聯賽包尾，目前率領球隊重建嘅人，正正就係上季被ＦＣ悉尼炒魷嘅烏福達雷，令今場「悉尼打吡」多添一份敵對火藥味。西悉尼流浪者今季亦有尼高拉斯米蘭奴域等球星回巢，但實力同ＦＣ悉尼仲有一段距離，主勝值得捧場。
