周六凌晨英超獨腳戲，愛華頓主場迎戰高雲地利。「拖肥糖」目前排聯賽第7位，不過佢哋穩陣有餘，進攻能力偏弱，聯賽勝率唔高，對住逐漸上力嘅高雲地利，絕對唔容易應付。愛華頓讓波畀唔到人信心，寧願博讓球客勝（+1）。文:工廠仔
（Now 621周六凌晨4時直播）
愛華頓喺莫耶斯領導下，踢法一向都係穩打穩紮，特別係今季買前鋒計劃失敗，依家只剩泰亞路巴利一個箭頭單天保至尊，所以9輪聯賽只係入得9球，容易被對手盯死；「拖肥糖」能夠排前列，全靠一條堅固防線。不過，愛華頓唔識進攻，就大大影響佢哋爭勝嘅本錢。
基亞利殊入雪櫃上陣成疑
「拖肥糖」最近8場聯賽，只有2勝4和2負成績，勝率其實只係得25%，而且兩場贏波都贏得非常牙煙，分別1比0僅勝葉士域治同紐卡素。愛華頓進攻人手不足，最近又有創造核心基亞利殊出現紀律問題，依家連續兩場被雪藏，幾時解禁仲係未知數，球隊入球能力再受削弱。
高雲地利今季重返英超後，斥重金進行大換血，一口氣簽入14個球員，太多新人搞到開季4連敗。不過林柏特嘅大軍磨合之後明顯有起色，近5場聯賽3勝2負，而且今季3場作客輸波，分別係輸畀阿仙奴、曼城同熱刺，絕對情有可原。高地踢嘅係體力化士氣波，唔怕同愛華頓鬥硬朗，受讓要捧場。
