今晚繼續有歐國聯首輪賽事，其中A1組焦點戰，意大利主場硬撼比利時。「藍衣軍團」連續3屆入唔到世盃堅羞家，今次搵番名帥文仙尼重建，回巢第一擊唔衰得，好彩撞正「私房菜」比利時，仲唔趁熱起筷咩，主勝有計。（周六凌晨2時45分開賽）文:法達斯維
意大利無緣2018、2022及2026年世盃決賽周，對一支4屆盟主嚟講確係講唔過去，最終搵文仙尼回巢執教。文帥曾經喺2018年接手意大利，並且之後勇奪歐國盃，但因為未能殺入2022年世盃，加上與高層交惡而分手，如今重返「藍衣軍團」，以佢嘅經驗有助重建球隊。
比利時遇剋星冇運行
文仙尼今次徵召咗34位球員，其中有9名新丁，包括薩斯索羅前鋒施巴斯坦艾斯保薛圖，咁啱已成常規軍嘅比奧艾斯保薛圖係佢細佬，兩人有機會合組「兄弟鋒線」，當然巴斯東尼、尼高路巴列拿等舊部仍入選，不過佢亦放棄用列迪古、文路爾盧卡迪利等常規國腳，內部競爭激烈，預料各人會搏盡爭取表現。
另邊廂，比利時雖然喺今夏世盃殺入8強，但主帥魯迪加西亞仍然離任，改由雲邦美接手，呢位昔日荷蘭中場悍將執教經驗唔算豐富，只係帶領過安特衞普勇奪比甲冠軍稍有成就，難與文仙尼相提並論。而且比利時由黃金一代變黃昏一代，仍要倚重奇雲迪布尼、盧卡古等老將，亦缺乏標青新星，不宜高估。兩軍近5次碰頭，意大利取得4勝1和，其中2次係由文仙尼領軍，擺明格食格，有望回巢首仗即打響頭炮。
