世盃進入8強關鍵時刻，奪標大熱法國將面對非洲勁旅摩洛哥嘅挑戰。法國有基利安麥巴比領銜嘅夢幻鋒線，不過上場對住巴拉圭硬朗防守吃盡苦頭，今場面對防守一樣咁堅，而且反擊更銳利嘅摩洛哥，法國肯定會謹慎應付，戰況將更加膠着，開半場和機會高。文:工廠仔
（ViuTV 99、Now 618及616周五凌晨4時直播）
法國今屆氣勢如虹，分組賽開始錄得5連勝兼有3場不失球，防守非常穩陣，而最重要當然係進攻「三叉戟」麥巴比、奧士文尼迪比利同米高奧利斯嘅發揮，佢哋今屆表現光芒四射。
「高盧雞」怕反擊唔敢亂嚟
但呢個「三叉戟」組合喺16強對巴拉圭嘅超低位防守，威力明顯大受削弱，最後僅靠1個12碼險勝，今場對住同樣精於穩守突擊嘅摩洛哥，入球難度有增無減。
摩洛哥殺入8強令唔少球迷覺得意外，但其實呢支非洲勁旅喺國際球壇已經威咗好幾年，上屆世盃歷史性闖入4強，上年非國盃亦贏得冠軍，佢哋最近34場賽事未逢一敗，法國要贏佢哋絕對唔容易。防守效率高係摩洛哥最大賣點，而且有巴謙戴亞斯同夏基美兩個反擊高手，隨時可以一招攞你命，令對手唔敢亂壓前搶攻。
摩洛哥充分利用防守力強嘅優勢，上半場經常能夠保住不敗，今屆5場賽事就有4場喺上半場打和，包括對住巴西、荷蘭同主辦國加拿大，上半場嘅表現同比數都不落下風，「和住踢」就係摩洛哥擅長嘅局面。法國本身踢法亦相當慢熱，分組賽對住另一支非洲球隊塞內加爾，上半場都只能夠踢成0比0；淘汰賽雙方都會避免犯錯，捧半場和好路。
