北美聯盃分組賽尾輪，國際邁亞密主場對利昂。國際邁亞密兩大入波泉源美斯及蘇亞雷斯都會缺陣，加上後防不穩頻頻失波，主場都未必惡得出樣。利昂近況回勇，喺北美聯盃兩戰全勝，今場再贏就肯定取得前4晉級，決心大於一切，勢必反客為主大打落水狗，冷敲客勝。文:渡邊年
（周四早上7時30分開賽）
先講講形勢，分組賽踢咗兩輪，「美職組」同「墨超組」頭4名球隊，全部都係兩戰兩勝有6分喺手，簡單啲講，後邊啲球隊要上前4出線，真係要以大比數擊敗對手先有價講。
現時國際邁亞密只得1勝1負，喺「美職組」同另外7支球隊同得3分，排9至16位，而且「美職組」頭6名都有6分喺手，國際邁亞密頭兩輪只得1勝1負，要爭取美職組頭4名直接出線席位，可以話名存實亡，而且球王美斯回國奔喪，今仗缺陣機會極大，另一名將蘇亞雷斯就要停賽，攻力大幅削弱。
國邁防守欠穩頻失波
不過話晒主場出戰，以「娛樂球迷」為大前提下，國際邁亞密應該都會繼續有前無後踢法，但佢哋近6場狂失12球，其中4次總入球開4球或以上，防守欠穩，如果仲要主攻，後邊大把空位畀利昂。
利昂雖然喺墨超開咧兩連敗，但近況見好轉，近期各項賽事3連勝，北美聯盃變咗佢哋回魂丹，頭兩輪全勝，現時狀態大勇，位居「墨超組」第4，如果今仗再贏，就肯定獲得出線機會，而且形勢上佢哋又冇國際邁亞密咁急於搶分，以佢哋近3場只失1球嘅防線，可以睇定嚟食，將「國邁」一劍封喉。
