英冠開鑼，上季喺英超包尾嘅狼隊於主場迎戰布力般流浪。狼隊引入捷比亞及有魯爾占美尼斯回歸，確實有啲睇頭，不過兩軍今夏都換咗新領隊，相信需要時間磨合，加上雙方近4次交手全開2球或以下，今場玩2.5球入球細似乎係最佳選擇。
（無綫myTV SUPER周六凌晨3時直播）文:渡邊年
先講講今季英冠升班附加賽改制，增加2個名額，聯賽第7同第8名都有得參戰，增加前列球隊競爭性。第3及第4直入兩回合準決賽，附加賽8強則由第5對第8、第6對第7，進行一場過比賽。
今場主場出擊嘅狼隊，絕對係升班熱門；由於英超有「保護傘機制」，降班球隊獲得聯盟一筆財政補助，為期三季，第一年補助金相當於英超球隊電視轉播收益嘅55%，即是話，狼隊比其他英冠球隊接近多5,000萬鎊資金買人，佢哋亦搵咗經驗豐富嘅捷比亞加盟，球隊Icon人物魯爾占美尼斯亦從富咸回歸。
英冠節奏適應需時
不過狼隊換新領隊，從葡超基維辛迪撬入施薩比索圖執教。施薩比索圖無論球員時代定執教經驗，全部只限於葡萄牙，從未試過出國搵食，嚟到英格蘭人生路不熟，仍然要時間適應。
布力般流浪同樣換咗領隊，曾經於2017至2022年帶領球隊嘅莫比利回歸。不過布力般實力有限，上季陷入降班漩渦，最終以20名衝過終點，預料莫比利今場作客戰術都會相應保守，加上兩軍近4次碰頭，全開2球或以下，推介入球細。
