今晚英超早場，新升班球隊侯城主場迎戰曼聯！無論名氣或實力，「紅魔鬼」曼聯都勝一籌，應會採取主攻力爭打響頭炮；侯城闊別9年再戰英超，第一擊喺自己地頭比賽，士氣肯定高昂，相信亦唔會退縮，加上曼聯近期防線唔多穩陣，往往早段失波，導致近3仗上半場總入球全開2球或以上，一於再追1.5球半場大。（Now 621及611周六晚7時30分直播）文:Mic
侯城上季英冠排名第6，憑附加賽取得升班資格，難得重返英超，季初鬥心一定強，更何況有地利之助，就算實力較弱都可以靠拚勁，一人跑多一步同對手周旋到底。尤其係曼聯對上一次同侯城交鋒已經係9年半前，短時間內未必可以摸清對方踢法，侯城有機會開波早段趁機偷襲，隨時入波都唔出奇。
紅魔睇中阿歷斯巴迪
事實上，曼聯近期後防甩漏多多實在不敢恭維，近4場熱身賽都係上半場已經失守，上仗更以2比4不敵AC米蘭，左後衞勞基梳爾表現備受批評，中堅利辛度馬天尼斯為阿根廷踢完世盃決賽後，僅於上場熱身賽後備入替踢咗30分鐘，狀態不足之下，今仗可能焗用19歲小將艾登希雲擔任正選，令「紅魔鬼」防線存在極大隱憂。有指會方睇中巴塞左後衞阿歷斯巴迪，力邀呢位22歲西班牙國腳加盟，鞏固防線。
不過，曼聯中前場人腳鼎盛，般奴費南迪斯、馬菲奧斯根夏、麥比奧莫都係獨當一面進攻好手，新加盟中場泰利文斯攻守兼備，並且擅長遠射，令對手防不勝防；深明防線不穩，相信作客嘅「紅魔鬼」都希望盡快攻破侯城大門，以免夜長夢多。今仗入球大細中位數由3.5球起跳，反映應該多入波，好可能上半場就出現入球騷，1.5球半場大值得捧場。
