德甲開鑼！擂台躉拜仁慕尼黑啱啱捧走德超盃，強勢展開衞冕之路，第一擊迎戰上季排第4嘅史特加，兩隊都係火力十足嘅球隊，上季屬德甲入波最多頭兩名，駁火味十足。拜仁有「史特加剋星」哈利卡尼壓陣，隨時一個入幾球，今場入球大去到4/4.5球都要捧。文:工廠仔
（Now 639周六凌晨2時30分直播）
拜仁上季德甲喪入122球，哈利卡尼、路易斯迪亞斯同米高奧利斯組成嘅鋒線無堅不摧，今季仲簽埋摩洛哥猛將沙巴利，德超盃贏多蒙特已見到佢哋狀態好弗，今仗主場出擊肯定火力全開。加上哈利卡尼向來對史特加特別醒神，近8次對佢哋入咗14球，當中3次「戴帽」，有佢喺度已經係入波保證。
上季金靴銀靴駁火
史特加上季係德甲入波第2多球隊，教練施巴斯坦漢尼斯崇尚進攻，陣中亦有上季德甲射手榜、入波僅輸畀金靴哈利卡尼嘅丹尼斯烏達夫，季前又簽入德國年輕中鋒柏積仙奴域同烏達夫拍檔，上場德盃4比0炒羅斯托克，柏積仙奴域就連中三元，史特加進攻有睇頭。睇番拜仁上季德甲兩循環對史特加，總入球全開5球或以上，梗係再追4/4.5球嘅入球大。
